Luke 19

Jesu'o Sakiasi Puni Vu'ijina

1Hu Jeriko ari ma'aha rira kajino va'ana. 2Ea pina takisia'e apeji'ina ni'ine 'ee monia niho'o ani reji'ina iha huna Sakiasina'omo ara kajino hinuna. 3'Enakaivo ea kajaho ea tu'umaa'omo Jesu ka'i 'ahaume venana kaivo eaka mapokijipo nuhaume pakamana. 4'Enarena hu urane ninuma va'e turipa 'ahi Jesura vahuni jihuniji va'e ka'i 'ahaume hinana. 5'E'eme Jesura roe hura hinani hari nami'ika'i a'ame kamarena ijá 'wama Sakiasi mamako ariha roa. Ijihuni maijaho Na iviasa oni sei vu'e hi'ejukúne 'wamana. 6'Ejume hu mamako ariha roe Hu 'ajomana. 7'Ejume pu ea mapoka ijí kamareja su'aravi'i ijá 'wava Hu ea ikaho ea sisea ikehuni sei va'u 'wavara. 8'Ejume Sakiasira 'urine Natohwijaho ijá 'wama Hena! Natohwe na nuni kukua pwinana'a ea ka'ene uneunecha pa'ajihi vajihe 'ee nara ea 'ahopuni nesa'e apejujaho na 'aha no'ona no'ona ijano huri eha venahuna 'wamana. 9'Ejume Jesura ijá 'wama Godoni Ni'ajihi'inijaho iviasi sea ikino roana. Ijihuna'e ea ike 'u'o Eparahami oni hariha renana. 10Ijihuni maijaho Ema Puni Harihijara ea ka'ene 'unama puruva renau'ukame pivusaha ojujihi sarame nianae ni'aji'i 'ahaume roana 'wamana.

Korutia Oma Huni Haa

(Matiu 25:14-30)

11'Enarena Hu ea ka'ene Huni vu'a kaji hejajihi ike haakaho 'waramana. Pu vwihajajaho Godoni ara niro'i venu 'wavara. Ijihuni maijaho Hu Jerusaremi rori va'ajiva jihuna'e pu vwihana 'wavara. 12'Enarena Hu ijá 'iama Ea pina ara pini va'e ea natohwa renareje 'unama ro'i 'ahaume va'ana. 13Hu iji'a va'i 'ahaume huni pwehija ea iropu ropuna'omo 'umenaume roajivume ea kwinu kwinu monia (K20) vajiha ijá 'iama Na va'eje monia ikaho 'eka va'e unenu'u 'aho'a ve'eje na 'unama routa 'iamana. 14'E'eme huni aea hura puni natohwa'e rehunijaho senavume pu ea irechamiume ona'e apena va'e ijá 'wava Nú ara núni natohwa'e rehunijaho senumu 'wa'i 'ahiume va'ajivara. 15Ea kajaho natohwa renarena hu kú'o 'uname roana. 'Enarena hu ni'aha kwino huni pwea ka'ene hu monia vajihajaho pu monia ichá'ina'e vejaji ki'i 'ahaume 'umenaume roajivara. 16'Ejume ea pini ijá 'wama Natohwe ara monia (K20) ka'ene na vajiha ja'ina'e na kú'o areri ija'ina huri (K200) 'ekuta 'wamana. 17Hu pwea kajaho ijá 'wama A niho'o mamaa'e venajihuna'e a pwea mamaa. A uneunecha ma'u'umaa hami 'ajoha jihuna'e nara ara mama'ina iropu ropu vajahe ara ijaho 'ajo'ena 'wamana. 18Ea pini roe ijá 'wama Ara monia (K20) ka'ene mihajino na apene huri vahame (K100) 'eka routa 'wamana. 19Hu ea kaji ijá 'wama A ara mama'ina iropu 'ajohuna 'wamana. 20Ea pini roarena ijá 'wama Natohwe oni monia na akisi mwama ranavutakúne apena. 21A ea ajisina'omo soa ka'ene a pasamajaho a juara samuna. 'Ee a oni ija pa'onajaho a menuna 'wamana. 22'Ejume ijí ea kajara ijá 'wama Ike niho'o pwea ka'ene ea maa pa'akera ara ichá'ina 'warama jihuni toi na eha mahuna. 'Ú a pahena pakimune? Na ea kisina'omo na raka ka'ene pairechavujaho na 'ekure? 'Ene na nuni iji pa'ojujaho 'ú na pamejure? 23Iraka vene monia kajaho pa'eka va'e panika vaji irecha'ira'omo na roe ijaho 'eke 'ee 'aho'a ijí huri 'eku'e? 'wamana. 24'Enarena hu ea ka'ene ijá namijaji ijá 'iama Monia ka'ene nara vajahaji kú'o 'eka va'e ea ka'ene monia (K200) venaji maha 'iamana. 25'Enakaivo pu hu ijá 'wava Natohwe huni monia (K200) namu 'wavara. 26Na ja 'waravu. Ea irara uneunecha rukinijaho mapoka huri vajahuna. 'Enakaivo ea irara pa'ana re'amajaho raka ka'ene hununa'i navujaho 'etujahuna. 27'Enakúne iviamaa nuni naka ka'ene nara puni natohwa'e rehunijaho ura parenajija aherame roe nuni una'i 'ania kwamasaha 'iamana.

Niho'o Temaraji'i Jerusaremi Vaji Roa Arumajina

(Matiu 21:1-11; Maka 11:1-11; Joni 12:12-19)

28Jesuho ijá 'waravume pa'are'eme Hu urane Jerusaremi va'ana. 29Hu roe huri'a iha Arivi 'wavuraka ara iha Petapeje Petani 'wavujihuni roriji vai'i Huni tisaiporu no'ohe'i irechami'ika'i ika'ina 'waramana. 30Ja va'e ara pini usevi'i kave tonikia pirona i'ivananave namija ka'avajaho ea mai'o ijihuni toi pa'oji'inakúne rasame apene ro'avara. 31Ea 'ahopo aporame ijá 'iava he'avajaho Ja iraka'e vene rasavo? 'iava he'avajaho ijá 'ia'avara. Nuni Natohwijara ura reju'e ijihuna'e avaju 'ia'avara 'iamana. 32'Ejume pu vai'i kivume uneunecha mapoka kajija areri Hu 'warama kaja'ina'e rejara. 33Pu tonikia pirona kaji rasa'eme ea anesuri aporame ijá 'iama Ja iraka'e ve'irono tonikia pirona kajaho rasavo? 'iamana. 34'Ejume pu ijá 'wava Núni Natohwijara ura reju'e rasavu 'wavara. 35'Ene pu tonikia pirona kajaho apene Jesuni roajivara. 'Ene ateha ijí tonikia 'aha kajino risaremu va'o Jesuho ni'ajaha apene ranavume ajime asuma hinana. 36'Ene Hu va'eju'e pu ateha 'eke 'unamutoi risarevara. 37Pu va'ajime huri'a Arivi rori vutuijino tisaiporu mapoka'e piunime Godira uneunecha mavarasa'ina ka'ene vejume pu kivajihuna'e teimani 'wame 'ee ta'arohi'i va'ajivara. 38Pu ijá 'umeja

Kinia ka'ene Natohwi jihuni iha 'ahi roujaho merajaha! Matauvi'ina 'akúpi 'ahi name 'ee Godi Ichutomaijí ta'aroha 'umejara.
39'Ejume Parasia 'ahopo ea rira kajino Hu ijá 'wava Najuhi'ine Oni tisaiporu 'uraraha 'wavara. 40'Ejume Hu eha vene ijá 'iama Na ja 'waravu. Pu irano'a are'avajaho muna ikipo 'urine mwasirihuna 'iamana.

Jesura Jerusaremiumu Venajina

41Hu ara natohwi jihuni rori roi kamarena niramana. 42Hu ijá 'wama A iviamaa uneka ka'ene venae matauma hihuniji ape'ipisa nimaa roja'a kaivo iviamaa a areri pakahuna. 43Vea ijihunijara ro'eje oni nakapo roe a júhone rora rora kaji rene roaji'eje a 'e'u'amajaho pu tanu'urihuna. 44Pu a niho'o tirakunahe 'ee oni sesamaa pu'úmo ea ka'ene ijihuni vaji hijujaho ato'arumahe parane 'ee muna pina oni ruha panahuna. Ijihuni maijaho Godira a ni'aja'i 'ahaume ro'ajaho a pakama jihuna'e avahuna 'wamana.

Jesura Temiporua Vaji Va'e Amairiajina

(Matiu 21:12-17; Maka 11:15-19; Joni 2:13-22)

45Hu Temiporu vaji va'e ea ka'ene ijí 'ime'aravi'i hijajihija 'ararihiana. 46Hu pu ijá 'iama Godira Huni ira vajijino ika'ina venana.

Nuni sea Nuni siporua'e 'ohuni ara. 'Enakaivo ja apene nesa apehuni ara'e veju 'iamana.
47Hu veku veku Temiporu vaji va'e najahuna. 'Eju'e pirisitia mama'ina 'ee Sikuraipia 'ee emaa puni mama'inijipo 'ana'i 'ahiu'e vejura. 48'Enakaivo pu areri parenauna. Ijihuni maijaho ea mapoka roe Hura vu'a ka'ene 'waramujaho niho'o ira avwanamie hejura.